上目．視覺　隱蔽眼鏡店尋珍

「四眼仔」近期變成了潮人標記，沒有近視老花的都入手唔執輸，隨之暗湧出高質眼鏡市場，「手做」眼鏡成為入門準則。這個勢頭，令眼鏡Boutique冒出頭來，但為數不多，真的一間起兩間止。「上目」與「視覺文化」，位處九龍城與大角嘴兩處不就腳的食城之內，賣的，就是沒有大牌印在框外的高質眼鏡。

記者︰吳美美
攝影︰伍慶泉（上目）、譚盈傑（視覺文化）
Model︰Reila@Starzpeople
Makeup&Hair︰Dianna

http://hk.myblog.yahoo.com/willormakeup

店員一︰「阿B女讀書讀成點呀？」
店員二︰「家我哋做緊promotion，買$500送$500喎。」
店員三︰「呢個牌子係日本手做，一日做得五副……」
以上是眼鏡舖不斷變遷下的簡單寫照，由鄰里關係至連鎖店至精品小店，像是兜了個圈，重投具個性的眼鏡店懷抱，都是大家追求品味生活下的產物。
下文中的兩間眼鏡店舖店長，都是接觸眼鏡行業已十幾廿年，由紅褲子出身到現時自作業，透過它們說出香港眼鏡潮流路向，最好不過。

25歲後不再擺牌子

Kelvin是上目眼鏡店店長。說到過去大家都愛眼鏡框外有個大logo，現在剛好相反︰「其實都是後生仔愛戴名牌，擺明話你知係名牌；但通常25歲後就意識到，唔可以再擺個牌子出嚟，好尷尬！於是開始認識講求手工嘅品牌，當然市場比例仍然以我要話畀人知我戴緊名牌嘅人居多。但是情況真的有轉變，講畀人知眼鏡係來自日本邊個師傅，會仲型！」好想問，點解日本手做眼鏡特別矜貴？歐美都有喎！「最大分別係，歐美好少用人名建立一個品牌，通常以廠名命名，用一大班師傅去做同款式眼鏡；而日本就有好多獨立品牌，以師傅名命名，只有少數人知點整或只得一個人知，如果師傅已80幾歲，啲人會buy佢仲可以做到幾多副，感覺越來越罕有，所以貴。」
話題一轉。現時一批新進眼鏡買手——潮童，點睇如此情況？「佢哋入嚟買嘅時候，唔多講嘢，尷尷尬尬，事前已做晒資料搜集，嚟到心目中可能已有三個選擇。試完就話要邊副，唔需要問太多，因為上網已知晒價錢。」

上目店長Kelvin

＠上目

「日本手做師傅，上年紀的可能月產只有200副，本土已佔60-70%銷量，剩低就分配畀全東南亞。」

Lessthanhuman（S-FOUR）長頸鹿圖案眼鏡$3,280

除咗圖案顏色趣致之餘，柄身可以扭至另外一面，即一框有兩色。

與市（Y9）玳帽色眼鏡$2,980

框身四周作起角打磨，並非大路的圓滑鏡框，全日本只得呢個品牌做到。

Specespace（es-6055）黑色金屬框眼鏡$3,400

以力學設計，戴上去好似包住個頭，好舒服。

1.PlaToy（Delsol）綠色方框眼鏡$2,780

設計師曾參選白山眼鏡設計，所以有其自然風格。

2.與市（Y10）玳帽色眼鏡$2,980

近鏡可以看到它的周邊位呈90度切割，手工很精細。

3.Lessthanhuman（S-Three）彩色方形圖案眼鏡$3,280

與長頸鹿圖案同款設計，但這款懷舊味強烈。

4.Specespace（IOFT會場限定版）白色金屬框眼鏡$3,400

屬於當時會場獨有的限定色，要在當場才可訂製。

上目Website︰ http://www.ocularplus.com

上目（23831618）九龍城衙前圍道17-19號地下C舖

外區客捐入大角嘴

Pazo是視覺文化店長。先前提到眼鏡行業的轉變，入行有廿年的Pazo有何看法？「最大轉變係時裝品牌眼鏡，由十幾年前引入只佔少數，到現時成為主流，部份眼鏡連鎖店可能有八成都是賣緊時裝品牌。」經常不解，為何現時眼鏡貴一貴都有人買呢？「聽老前輩講，七十年代配一副玳瑁眼鏡都要$500，買層樓可能先至萬幾蚊。所以話七八十年代，眼鏡在當時真正叫做貴價產品，import入來的眼鏡閒閒哋千幾蚊一副，相對當時物價家計番即係要成萬蚊一副，主因係以前眼鏡舖唔多。」原來連眼鏡售價都是一個循環！
循環兩字在時裝界經常使用，但也影響至眼鏡款式，若不是潮流興懷舊，黑框眼鏡就不會如此大hit至現在。Pazo說韓國女星經常戴黑框boyfriend眼鏡上電視，仲型！講起型，其實視覺文化仲型，選址大角嘴港灣豪庭商場之內，比上目地舖更難找，靠的應是尋珍人士吧！「慕名而來的客是較多，外區客與街坊客比例應該有8:2，而且很多時都會一次過買幾副，不同品牌國家的都會買，用嚟日日配襯為主。」他們現在銅鑼灣亦有分店，比這裏肯定就腳十倍。