歐洲冠軍球會盃四強決鬥進入最後階段，聽朝凌晨（四月廿八日凌晨二時四十五分）就係次回合生死戰，里昂主場迎戰拜仁慕尼黑，四月廿九日凌晨二時四十五分，巴塞主場迎戰國際米蘭，夠晒刺激。里昂與巴塞在首回合因舟車勞頓，主隊以逸待勞，分別取勝。照計明後兩日兩場球賽會好緊張，里昂上次只係輸○比一，主場有力反先，何況拜仁主將列貝利會罰停賽㖭。不過德國球隊素來好有韌力，畀佢領先咗就麻煩，曼聯就嘗到苦果啦，左丁山預料今次里昂會贏波出線，即係話戰果會是二比一，三比二之類，贏咗都冇用，但落注一於博里昂「主勝」。
巴塞對國米當然會更刺激，全世界球迷都期待地球最強球隊今年會在皇馬球場捧走歐冠盃，落晒皇馬面子兼且創下歷史性、連續兩屆捧盃嘅紀錄。點知天意弄人，竟然因為一場冰島火山爆發，連累巴塞球員，要坐巴士去米蘭，話唔攰就假嘅，我哋睇見巴塞球員在上星期首回合下半場圍攻國米，但埋門就次次慢咗一步半步，就知道國米盡可享以逸待勞之利。英國著名球評家RobHughes話現在已發現一個打敗巴塞嘅方程式，就係（一）賽前編排巴塞先打一場打吡賽，面對死敵愛斯賓奴，（二）停咗飛機，逼巴塞坐巴士，行幾百公里先至到達球場，（三）主場草地不剪草，不灑水，令球場地硬兼草長，令巴塞啲地面短傳失準；（四）搵葡萄牙人摩連奴做教練，（五）搵葡萄牙人做球證！
Hughes係開玩笑啫，佢話公道啲睇，摩連奴嘅戰術極為成功，國米球員拼命一百零一分，奔跑至倒地抽筋不支為止（D米列圖），而且放棄半場，密集防守禁區外圍，縮窄防線，令美斯無法個人突破，進攻方面就靠前鋒以高速突擊，雖然先失一球，可以反先三球，唔到你唔服。回到巴塞主場魯營，有剪草，有灑水，唔使旅行，巴塞可唔可以回復本色，摧毀國米呀？呢場巴塞必須贏二比○，或四比一，先至可以出線，難度幾高，國米有一個史奈達，有一個伊度奧，隨時可以靠反擊入球，害死巴塞嘅，呢場波雙方鬥智鬥力，捱眼瞓都要睇，博好分就細注買巴塞贏三比一，加時再入一球啦，氣死摩連奴！