無請政治助理、spindoctor嘅政務司司長唐英年，原來鍾意親力親為，噚日以署理特首身份頒發報業公會09年最佳新聞獎，八方恭喜各位得獎行家。唐公子致辭時特別向前線記者賣口乖，唔知係唔係想記者對佢筆下留情，指記者人工唔係特別吸引，留唔住人才，搞到傳媒機構青黃不接，可能影響新聞質素，幾乎開到口叫傳媒老闆加人工。
希望可留住有心人
唐公子噚日指聽到唔少記者反映，人工雖然未至於去到30蚊甚至更低呢啲最低工資臨界點，但都唔吸引得去邊，如果要成家立室、生兒育女，資深傳媒人難免選擇轉工，留唔住有資歷與年輕人嘅話，佢指青黃不接情況會影響新聞質素，要認真探討同正視。
80後衝擊建制，傳媒機構內80後記者同上司意見唔一致亦都好正常，唐公子話知道傳媒機構家陣都要花唔少時間去討論、協調，佢話希望睇到持平翔實報道。有行家質疑唐公子咁講，潛台詞係督促報館高層要盡力「河蟹」啲80後記者，唔好畀咁多不利政府消息出街，報道「持平」嘅記者，應該加人工啦。真正有heart嘅記者，八方相信冇可能被「河蟹」，唐公子新聞秘書指，其他地方都會用優厚待遇留住新聞從業員，記者可以係終身事業，對專責採訪嘅問題認識好深，可以做有深度採訪，司長都希望香港傳媒可以留住有心人。
有月薪低至$6500
唐公子對住記者口甜舌滑，對提高記者待遇應該無補於事，八方向新入行記者查詢，發現有報館畀大學畢業嘅記者月薪低至6,500蚊，一般有8,000蚊至10,000蚊左右，《蘋果》有11,000元。新入職記者面對低薪命運，現職記者繼續捱，記協最新一期會刊《記者之聲》調查傳媒本年加薪情況，發現十間加薪，八間凍薪，餘下三間未知，絕大部份加薪不超過百分之三，低過港府預測通脹數字，實質工資負增長。
指前線記者不易為感觸良多
幾個月反高鐵風頭火勢，事件唔單止喺立法會內、外有極大爭議，記者私下都有一場極之壯觀筆戰，有行家喺網上寫咗不滿反高鐵人士嘅感想，結果引起好多回應同辯論，估唔到唐公子都收到風，噚日喺新聞獎頒獎典禮度特別提到「過去一年也有傳媒不時成為新聞主角。」
唐公子話記者受到部份社會人士干擾甚至不友善對待之風不可長，如果因為報道「唔啱聽」、「唔啱睇」，就對記者謾罵或人身攻擊，係濫用言論自由。
雖然唐公子冇說明邊啲新聞令記者遭不友善對待，但據稱佢對「事旦男」、議員鬧記者等事件都幾感觸，慨嘆前線記者不易為，所以特別趁機為記者抱不平。支持高鐵、唔報六四新聞獲高官開腔「平反」，批評政府嘅新聞，唐公子當然避而不談。
近年免費報紙異軍突起，唐公子形容只係「早餐、點心，或者是快餐」，市民應該注意均衡飲食，不妨每日多花幾蚊買報紙，令精神食糧更加富足。
mailto:[email protected]