上海世博本周六（5月1日）揭幕，雖然早前有網友踢爆由劉德華、劉翔同李寧等合唱嘅世博會序曲《2010等你來》，涉抄日本女歌手岡本真夜97年舊作《就這樣一直愛着你》，但無損世博邀請日本藝人擔任表演嘉賓。噚日上海世博局活動部同SMAP所屬嘅日本尊尼事務所，宣佈日本人氣組合班霸SMAP將於6月13日下午1時喺上海世博會浦東園區內世博文化中心舉行「SMAP放歌世博樂迷會」。
嚴禁帶相機橫額
由萬人迷木村拓哉、中居正廣、稻垣吾郎、草?剛同香取慎吾組成嘅SMAP，自1988年成立以來都深受亞洲觀眾歡迎，不過五子原來從未喺日本以外地方以團體名義開騷。今次SMAP將第一次海外處男騷奉獻畀上海世博會，演出時間暫時公佈為90分鐘，門票唔會公開發售，以現場預約制方式派發，派發方式係持有上海世博會非指定日普通票嘅遊客，可以喺6月13日當日到世博文化中心預約處領取入場券，但門票數目家仲係未知之數。
為免表演受到影響，SMAP演出期間規矩都好多，除咗禁止攜帶攝影、攝像同錄音等電子器材設備外，仲連支持佢哋嘅橫額同附屬品都嚴禁帶入場館。
SMAP十分重視今次演出，佢哋喺東京接受訪問時話：「這次我們去參加世博樂迷會的活動，真的感到非常光榮，謝謝大家，能夠與長久以來都支持SMAP的中國觀眾一起交流，我們感到非常愉快。」