花旗國投行一哥高盛俾證監告嗰單嘢搞到滿城風雨，華華唔係法官真係唔知會點判，但就有樣關於高盛按揭部門嘅趣聞可以同大家分享吓。
話說個部門喺07年憑住打賭按揭證券價格狂瀉，大賺咗40億美金，差唔多有成312億港紙。賺咁多，花紅自然派得多，班員工高興起上嚟，就乘機搞咗個漢堡包競食大賽，仲開埋盤打賭參賽者可以食到幾多個漢堡包。乜都賭得一餐，賭徒性格貫切始終，又難怪佢哋賺大錢嘅。
華華都有玩開美股，好有興趣知道究竟佢哋食咗邊間快餐店嘅漢堡包，係McDonald、BurgerKing定係Wendy's呢？齋講今年，孖辮妹妹同漢堡王股價齊齊升超過17%，老麥就只得14%，輸晒！