美股升上19個月以來高位，帶動港股昨日急漲342點，收報21587，不過大市成交量卻驟降，只得566億元。雖然睇落港股走勢已重越100日線，但大市反彈卻欠缺成交，而且又臨近期指結算，問題係家陣環境氣氛無乜條件可以畀個市借題發揮。內地樓市係咁打壓，之後會否帶出資金緊絀之利淡因素？值得股友們留神。
股壇傳統智慧有句「五窮六絕七翻身」，5月份快到，若然上述假設成立，係咪仲持重貨在手？股友們要自行衡量形勢。
無論大市升定跌，一樣有股份跑出。好似安東油田（3337）呢輪升勢都算唔錯，由本月初0.72元水平展步炒上，昨續升2.4%，收報0.87元，已突破近3個月高位，後市只要守穩10日線0.83元唔穿，走勢仍會反覆向上，呢一轉應可先見1元大關。
安東油田剛公佈，從中石油（857）各下級單位上報的水平井分段壓裂服務，102口油氣井中取得77口井工作量，平均單井價格為220萬元人民幣。
方星俠