張家輝日前偕鄭秀文（Sammi）到青海災區探訪後，昨日二人又趕返香港出席「演藝界情繫玉樹關愛行動」，家輝表示見到災區小朋友心靈上所受創傷令他感到心痛，而Sammi到ICU探訪時憶起父親當年做腦部手術入ICU情景，頓時百般滋味在心頭。
張家輝日前偕鄭秀文和莫少聰到青海災區探訪地震災民後，即飛往北京工作，至昨日他又趕返港參與晚上紅館舉行的「演藝界情繫玉樹關愛行動」大滙演，認真頻撲，家輝昨晚表示到青海探訪時，見到當地小朋友留下心靈創傷最令他感到心痛。
張家輝和Sammi昨晚在後台接受訪問，家輝表示到青海醫院的ICU門口時，已感到氣氛十分沉重，恐怕入內後自己難以承受，所以問同行的Sammi「頂唔頂得順」，由於Sammi表示沒問題，所以交由她負責。
緊握婆婆手
Sammi說：「我冇喊，因為想帶正面力量畀佢哋。有個婆婆成身紮住晒唔郁得，佢俾嘢壓到胸口，我揸住佢隻手，佢有意識握番我，當時好感動。婆婆想講但講唔到，我叫佢放心，佢屋企人喺外邊，叫佢放心休息。我諗番起當年爸爸做腦手術入ICU，成個樣變晒，見到個心好唔舒服。」對於港人黃福榮的英勇表現，Sammi直指是發揮人性光輝。另外，Sammi透露昨晚出台時在後台仆倒呈大字形模樣，令她十分尷尬。
問家輝此行有何難忘經歷，他說：「有個幾歲小朋友見到地震覺得好可怕，覺得好似俾刀『行』住咁，自己都覺得好難受。」
家輝憂災童
此外，張家輝昨日接受商台電話訪問，表示先後到青海西寧5間醫院探訪，災民見他們前來探望感到開心又激動，傷者除有婦女和小朋友外，更不乏壯健男人，他們都是一些武警或軍人。
張家輝說：「呢啲男人都係先頭部隊入災區救人，最後都敵唔過高山症，肺水腫要入院醫治。」問張家輝是否瞞着老婆關詠荷前往探訪，他說：「記者問我嘅時候，佢真係未知，之後我即刻通知佢，佢都好支持我，同個女講咗，見到個女知我去探訪眼濕濕，好唔捨得咁，我都好冧。」
採訪：魯萍、胡比
攝影：陳順禎
鮑姐忍眼淚專業
昨晚大滙演開場時，大銀幕播出青海災民悲慘情況，台上不少藝人見狀均忍不住眼濕濕、鼻紅紅，例如鮑起靜（中）和大會司儀鄭丹瑞等，但鮑姐一見鏡頭轉向自己時，即收起淚水呼籲觀眾捐款，表現專業。
麟李微博傳善心
近期藝人掀起微博熱，昨晚籌款滙演中，不少藝人紛紛將花絮第一時間放上微博，如譚詠麟、李克勤、余文樂和陳倩揚等等。而因為身在北京拍戲而未能趕返香港出席大滙演的郭富城，昨日也透過微博跟一眾藝人打氣。
韋哥父子齊呼籲
是次籌款運動連荷李活明星也關注，成龍找來他於美國的明星朋友拍下短片呼籲，除了有KennyG外，還有韋史密夫（WillSmith）和兒子一起拍短片，他們表示關注玉樹的新聞及最新情況，全美國人也會支持玉樹災民，並會為他們祈禱。
