相信好多人仲記得「筋肉擂台」呢個體育運動大比拼日本電視節目，今個暑假將會有一個更大規模嘅球技格鬥上演，出席者係基斯坦奴朗拿度（C朗）等球星，可觀性極高。
今夏南非世界盃決賽周，肯定會將足球熱潮推向高峯，而主辦今次球技格鬥比賽嘅單位，為咗令球迷延續對足球嘅狂熱，所以決定喺7月17日，喺能夠容納兩萬觀眾嘅倫敦O2Arena（類似紅館）擺擂台，邀請C朗、朗尼、謝拉特、杜奧巴、法比加斯同韋拿等世界頂級球星助陣，可謂星光熠熠。據講，籌辦呢個比賽要成千萬鎊，認真大仗陣。
星光熠熠騷哥利
其實，球迷如果心水清嘅話，應該記得近年都有一個球星鬥射自由球嘅表演賽；而今夏呢個球技格鬥就係將比拼自由球規模擴大，參賽球星要鬥控球技術、射門勁度同準繩度，實行考驗呢班億萬身價巨星係咪樣樣都掂。
對球迷嚟講，C朗自然最具叫座力，除咗係呢位葡萄牙國腳加盟皇馬後、再次重返英倫獻技外，仲可以證明佢係咪當今球壇最全面巨星；皆因近一、兩年，C朗無論喺罰球、射門勁度、控球能力同盤球速度，都係數一數二。如果主辦單位能夠邀請到美斯參賽，相信球王大比拼一定收視爆燈！
主辦單位就希望呢個球技格鬥騷可以每年都舉行，等球迷喺歐洲各地聯賽唞暑期間，依然有機會睇到球星展示上乘技術。