越近5.16，怪事越多。例如，八方周圍突然好多人聞到味，覺得泛民的「溝通派」路線，再度抬頭，政改方案通過嘅可能性越來越大。又例如，近日全港街頭突然湧現一批印住「V516」嘅神秘貼紙，究竟代表乜？又係邊路人馬嘅搞作呢？
並非公社兩黨招數
八方收到料，呢批貼紙自前日星期六凌晨開始出現，至少喺旺角、灣仔、銅鑼灣、紅磡、中文大學、城市大學附近都見到佢嘅蹤影，夾夾埋埋冇一百都有幾十張，而且螢光橙底色好搶眼，上面清清楚楚、絕無和稀泥咁用咗黑色印住「V516」四隻字。
喺八方明查暗訪之下，首先證實呢批貼紙唔係公、社兩黨宣傳5.16公投嘅招數，亦更加肯定同噚日着晒橙色衫出來宣傳遊行嘅終極普選聯盟，絕對無關。
反而如果大家仲記得，舊年六四20周年前夕，同樣有批「VIIV」（六四嘅羅馬數字）白底黑字貼紙湧現街頭，仲喺台灣、大陸等世界各地遍地開花，後來先揭盅，原來係班從事創作同藝術嘅有心人，想趁六四20周年做番啲嘢，創作咗本網上漫畫，諗出呢招做GuerillaMarketing，即係街頭游擊式嘅宣傳。不過，唔知係咪螢光橙太搶眼，又或者5.16仲敏感過六四，今次啲貼紙好快就俾人撕咗落嚟。
爭取民主要靠自己
咁究竟今次嘅「V516」貼紙，又係乜嘢人做嘅呢？八方相信，答案要過多一排先揭曉。不過大家可以玩吓猜謎遊戲，究竟V代表乜？最正路梗係Vote，即係叫人5月16日去投票；亦可以係Victory，即係5月16日公投勝利；仲可以解做Voice，大家5.16要用手上一票發聲。
八方淨係知，家香港嘅公民社會越來越成熟，香港人都明白民主不是賜予的，喺民主路上，冇跟大佬好耐嘅人亦越來越多，因為大家都深切體會到，爭取民主，要靠自己。
mailto:[email protected]