八方認為，政府用規管示範單位等所謂「9招12式」轉移大家對樓市供求問題嘅注意，都算得上係高招。（其實9招同12式之間根本有重叠，但傳媒都被迫照用呢個term，政府咁咪就係叻囉。）不過，一直表現沉穩嘅鄭汝樺日前終於守唔住，反口覆舌，即刻俾網民強插。
鄭汝樺4月12日先公開講過，喺示範單位影相度尺係消費者基本權利，搞到多家傳媒紛紛派出記者去各樓盤測試吓係咪真，點知近日鄭局長又話發展商唔畀睇樓人士影相，可能出於商業考慮，政府好難規管。此語一出，網民怒吼，大鬧鄭汝樺呃市民。大家近期最鍾意引用嘅事例，係一間電器舖嘅店員因為誇大一部抽油煙機嘅轉數，結果被判坐監十星期。大家反問，點解賣抽油煙機誇大要坐監，賣樓誇大唔使？