係人都知前巴西球王「細哨」朗拿甸奴係超級大滾友，但爛滾始終係佢個人問題，只要唔帶壞其他人，其實冇乜相干。不過同佢一齊效力AC米蘭嘅柏圖，就俾呢個「色」途老馬帶壞，近排唔蒲夜店、唔搞女都唔安樂，結果搞到同結婚僅9個月嘅模特兒太太比托（SthefanyBrito）離婚收場。
巴西八卦雜誌《Quem》日前報道，舊年7月花30萬鎊（約360萬港元）搞豪華婚宴嘅柏圖，透過經理人宣佈同太太比托離婚；最近佢已搬離兩人共同擁有嘅大屋、去咗酒店住，柏圖外母珊迪娜就幫比托搞緊由意大利返巴西住。
聽知情人士講，佢哋段婚姻閃電玩完，其中一個原因係比托思鄉病嚴重，太過掛住巴西親友，同埋想繼續做模特兒而唔想留喺屋企做煮飯婆；但呢個唔係主因，真正「死因」係柏圖突然變得好爛滾，而且滾上癮。
養傷無所事事大滾特滾
柏圖身邊朋友話：「柏圖今季成日受傷，佢一唔踢波就無所事事，但弊在自制能力又低，結果咪搞到婚姻破裂囉！」柏圖點睇都唔似自己識得出去「搵食」嘅男人，可惜佢同波壇大滾友細哨都踢AC，「仙人指路」下，想點玩都得。
話說喺前個禮拜四，柏圖同細哨喺聖西路睇完一場青年軍比賽後，嗱嗱臨去米蘭市中心大滾特滾；咁都未算，佢哋一有時間就會將蒲點由意大利搬到法國，成日幫襯一間喺巴黎、叫TheLido嘅夜總會。
如果大家心水清，應該記得細哨喺加盟巴塞之前，喺巴黎聖日耳門踢過兩季（01至03年），所以對巴黎嘅夜生活瞭如指掌；柏圖有呢個師兄帶住，滾得開心之餘又夠放心。聽講巴西國家隊教練鄧加，知道柏圖變得好爛滾後非常失望，仲同親信講會仔細考慮選唔選佢打今夏嘅世盃決賽周；除咗巴西，聽聞連AC都好嬲，諗住今夏送走呢對爛滾孖寶，費事佢哋搞衰隊波。
