最美麗的祖母A女士請幾位師弟飲茶，約在上環「好彩」，左丁山好少去上環飲茶，一時之間唔知「好彩」喺邊度，要電腦J通知，最好搭電車，一定見到！電車乃港島最佳短途交通工具，如果唔嫌佢行得慢嘅話，坐電車上層，望出窗外睇商舖招牌，直情可以增加對港島各區嘅認識，當離島渡海小輪需要政府津貼之際，電車公司仍然只收兩蚊，真係抵到爛，兩蚊買一個雞尾包得唔得呀？何況電車仲有兩大好處：（一）環保，低排放，（二）集體回憶之寶，相信冇乜人反對。
飲完茶，A女士話要搵埋公關大姐大去瑪麗醫院探病，探邊位朋友呀？佢一講，左丁山就唉唉唉，原來大狀W某日頭暈，但並非中風，急送入醫院，驗到腦部有事。三月十日左丁山與大狀W坐在晚宴主家席，佢仲談笑風生，講緊帶隊去巴黎試酒試菜，想唔到佢素來精神奕奕，膽固醇甚低，竟然個零月後就瞓喺醫院，教左丁山寒心。
電腦J聽到消息，告知我哋博士W月前中風，不能認人，現已到廣州延醫治療，研究C到廣州探病，發覺無言以對，不禁神傷。我哋聽完，又係愕然。博士W平時不喜應酬，夜晚好少出外吃晚飯，生活極有規律，每日運動甚勤，身形瘦削，與我哋呢班不運動（或少運動）多飲食應酬嘅損友比較，佢係最唔似會中風之人。A女士嘆息話：「你哋好命啫，隱藏性心臟病好多時係DNA之故，即係遺傳啦，有乜好講！」科學啲講就係遺傳因子作祟，傳統啲講就係天命如此，冇得好講。於是即場做調查，社長L與總裁L兩人都係日日食緊Lipitor嘅；大家不如照《蘋果日報》所報導，北京領導人每日食乜，我哋就食乜啦，夠健康喇啩。想到咁，飲茶完畢，飽飽哋，索性連搭電車都費事，步行返中環寫字樓，行咗大約十五分鐘，心理上覺得舒服啲，算係減少一啲平時不運動嘅「罪惡感」！