Neway卡拉OK全線收購加州紅，呢個消息唱K一族個個都消化晒。不過，加州紅仲有啲手尾留低，之前透過繳費靈攞到加州紅現金券嘅朋友，原來攞住現金券唔一定可以過戶去Neway嗰邊用，唱K時想用呢啲優惠嘅朋友，可能要山長水遠走入元朗，唔係就好大機會得物無所用。
Neway職員話NoWay
小妹噚日收到一位讀者吳小姐投訴，話早幾日打電話去旺角家樂商場地下間加州紅GreenBox訂位，諗住噚日落去用咗手頭上嗰三張現金券，朝十至晚四時段任唱任食玩番餐。好衰唔衰，噚日去到現場，職員先通知佢間場前日已經執笠，正式易名Neway，喺新店用番加州紅嘅現金券就NoWay，仲提醒佢家加州紅只得番元朗一間，現金券要去元朗先有得用。
其實呢啲加州紅代用券，寫到明去到6月30號先到期，家未到期已經形同作廢，畀着小妹遇到吳小姐嘅情況，都會據理力爭，唔爭取就一定冇運行。吳小姐經過一番理論之後，終於可以去附近彌敦道富華Neway用張優惠券。經過小妹索料之後，原來吳小姐嘅情況唔係冰山一角，有其他朋友試過打去家樂加州紅訂位，職員都冇提及唔可以用現金券，究竟有幾多人仲有呢啲優惠券，睇怕都唔會少。喺度提醒大家一句，兩間K合併後，以往優惠唔一定適用，去之前問多句就點都唔會蝕底。
電郵：mailto:[email protected]