聽說內地人聽歌會將手機當Hi-Fi，就算有新歌亦只得下載版，稱「網絡歌曲」或「手機鈴聲」，造就新市場出現。過去一直只當甘草角色的冼灝英亦趁勢變身網絡歌手，處男作《最後的溫柔》早前全國推出，成為樂壇「新人」。
記者：蔡俊業
攝影：譚盈傑
「我無諗過出歌，但都開心嘅，因為做咗幾十年，都唔係話咩主角，都係多個渠道搵食。」人稱冼師傅，年少時學大聖劈掛，「畀幾蚊去大坑學！」八十年代初入讀邵氏武訓班後加盟無綫，九十年代初跳槽亞視。「早10年，亞視在廣東省沿海的普及程度比TVB還要高。」憑《勝者為王》和《少年英雄方世玉》，令他能夠回內地演出，登台賺人仔。「最初係94、95年同劉錫賢、歐錦棠佢哋返深圳唱，通常都係兩首歌：《友誼之光》同埋《我來自潮州》。」且地點不定，「商場、酒樓、Disco，乜都有做，唱吓歌之外，同觀眾互動吓，傾偈、抽獎，大概做50分鐘。」因而認識現時負責出唱片的老闆。
Facebook群組8,000人
亞視弱勢，6年前回歸無綫，不斷拍劇，唱歌的事擱在一邊，直至去年二人再遇，對方邀他唱歌。「因為語言問題，初初都要諗下，要講國語不如叫我講兩句英文仲好。」要照顧家庭，他覺得一試無妨，「做電視收入有限，而且近年收窄得咁厲害！」去年11月錄音，「佢又話我係演員，想拍埋MV做推廣，等人有得唱K。」MV放上網後熱爆，「最初純粹係朋友間分享，無預期香港有反應，點知早排去溫哥華出席武術比賽，喺當地有人認到我！」何止，仲有大批年輕擁躉，Facebook群組更足足有近8,000人！
管理學大師大前研一曾說，人生50歲過後若事業發展仍平平，就別奢望再有攀升機會，只因勝負已分。冼師傅的手機接駁鈴聲播着周柏豪和鄭融的《一事無成》，很應景，卻在52歲這年無心插柳走紅，或許專家之言也有講不通的時候。
