大家仲記唔記得,亞視或者有線曾經有位女主播叫做梁麗嫦?記得嘅話,又覺唔覺佢好似絕迹幕前好一段日子?呢位女主播07年告別新聞界,轉工去紅十字會做公關,最近連名都改埋,梁麗嫦嘅名字正式絕迹傳媒。
梁小姐最近改咗個好青葱嘅名字,叫做菁栘。栘字讀音係移,只係差咗一撇,但係呢一撇就關乎人生命數。麥玲玲師傅話,根據日本傳入嘅「八十一靈動」命名學,梁麗嫦本來嘅筆劃係44劃,係一個令女士愁眉難展嘅數字,梁菁栘就變成35劃,係一個對女性事業同婚姻都有利嘅數字。姓名學博大精深,信不信由你,梁小姐最近由機構傳訊經理榮升做傳訊及資源發展部署理主管,恭喜晒。