做學生幾好，自由時間多，有多啲機會示威。中學生要去考評局抗議，大學生拉橫額更加易成事，幾十個中大音樂系學生，前日舉晒標語喺校內示威，抗議校方打破音樂系屬於崇基學院嘅傳統，下學年音樂系新生可選擇到其他書院，批評校方黑箱作業，好離譜。
學生指中大音樂系自創系以來都屬於崇基，變得不可分割，如果分散音樂系學生到唔同書院，雖然暫時唔影響收生數目，所有配套設施，包括使用練習室、課室、樂器房、音樂廳、中國音樂資料館、視聽資料館等都維持不變，但就嚴重影響學生對音樂系歸屬感，為咗維持傳統，學生要團結反抗。反對嘅學生喺fb開咗個group，有千幾人加入，唔知能否返轉頭。中大發言人指會繼續諮詢師生，並解釋建議嘅新安排係要配合334新學制，希望畀新生自由選擇加入邊間書院。