立體眼鏡版暫時未出，但高清畫面下，入戲院時忽略嘅細緻位如皮膚紋理、質感，已近乎真實，連身上油漆亦具備立體感，質素有幾勁，自己買番隻感受吓啦！
記者：陳國輝
螢光草恍如真實
雖然唔使戴立體眼鏡，但Blu-ray所呈現嘅「3D」效果，其實係指CG真實程度！尤其係阿Jack被潘朵拉族人塗到成身油漆，成個土著嗰陣，當你仔細再睇，就會發現油漆與皮膚之間嘅質感，其實有微細區別，而且層次好唔同；另外值得留意，係每晚會出現嘅螢光生物，例如螢光綠嘅草、螢光紫嘅昆蟲，全高清顯示下簡直係「奇景」，幾可以假亂真；至於夜晚暗位，Details清楚睇到，論畫質已經不能再挑剔；當然，器材唔夠勁則另作別論。
叢林正過大炮聲
呢隻碟支援英語DTS-HD，可謂預料之內，只不過估唔到佢得5.1聲道，而並非7.1，呢樣有啲奇怪！無論5.1定7.1，必須大讚係音效定位做得非常出色，例如人物企喺畫面右邊，就算閉上眼睛，仍然感受到聲音來自邊一個方向；當然，呢樣要歸功於後期製作，不過各位睇碟時，記得留意叢林探險一幕，如樹葉被風吹動嘅沙沙聲，或來自四周嘅昆蟲叫聲，真實感非常強烈，甚至比中段後經常出現嘅超低頻大炮聲，來得更神似。
網民：出現無法讀碟
經名導演占士金馬倫之手，肯定大製作，但碟內竟然零Bonus，真係有啲意外！試問一套製作多年嘅電影，點會無嘢講，話唔定發行商稍後再推出一隻專門介紹《阿凡達》幕前幕後嘅BonusDisc，再刮你一筆！反而要留意，網上有人話發生咗無法讀碟問題，傳聞今次經過特別加密，如果播放器軟件唔夠Update，就有可能播唔到，小記當日以PS3播放，發現無呢個問題。
單碟Blu-ray（$239）
限量禮盒版（$319）
DVD（$159）
