白鴿黨元老馬丁係資深球迷，以前係利物浦擁躉，近年轉咗做車路士fans，長年睇英國波，練成分析英國政局獨特看法，噚日接受網上電台訪問時，談波論政由球場講到政治，評論下月英國大選形勢。
工黨白高敦民望跌，唔少人認為工黨大選形勢危危乎，馬丁卻指工黨似紅軍曼聯，表現曳極有個譜，因為工黨喺地區有好多樁腳，家陣就指工黨下台太武斷。
工黨係紅魔鬼，保守黨梗係藍軍車仔啦，馬丁指雖然保守黨黨魁卡梅倫民望領先，但未拋離工黨，似乎未成氣候再次執政，反而自由民主黨有「餐士」，事關邊個黨上台都可能要搵自民黨組聯合政府。
話雖如此，不過馬丁強調踢波冇情講，佢始終係捧車仔，曼聯？Noway！節目主持人譚香文並非球迷，聽馬丁講波冇乜機會插嘴，只係透露已回覆立法會，如果甘乃威前助理王麗珠唔出席聆訊，佢都唔會應訊。由於民主黨立場都係咁，委員會要查甘威，真係老鼠拉龜。