今日沙田有大賽，第七場係香港錦標一哩賽，跑一千六百米，本係世界上頂級一哩馬嘅大賽，可惜外國馬報名者少，可能係怕咗香港啲惡馬都未定。翻查紀錄，由二○○一年至二○○九年，香港馬贏足九次，外國馬係陪跑分子。今日出賽十二匹馬之中，只有兩匹來自外地，就係七號「大腦」（澳洲）及九號「歌功頌德」（南非）。最可惜嘅係英國馬「精靈貓」（CatJunior），因火山灰問題，上唔到飛機，被迫取消行程。兩匹外國馬之中，「大腦」本係香港馬，由蔡約翰訓練，在香港唔夠精英馬跑，返回澳洲出戰，雖然成績唔錯，但明明以前喺香港係敗軍之將，今日唔通會脫胎換骨？南非馬素來實力較次，「歌功頌德」Imbongi出動到蘇銘倫，亦難寄以厚望。於是爭冠軍一哩賽係香港馬之爭，一號「好爸爸」最具實力，會唔會攰咗呢？二號「再領風騷」高峯已過，排十二檔不利，四號「勝眼光」去年爆冷贏出，之後久無作為，十號「新力勁」質素不及，十一號「君子一言」有腳患難測，十二號「勇敢小子」跑得太多，應師老兵疲，於是乎剩番八號「自由好」，因次次輸畀「閒話一句」或「爆冷」，特登縮程跑一哩，鬥志壓一；五號「步步穩」復甦及時，大摩必為馬主李福鋆醫生爭光，六號「締造美麗」路有專長，三號「友誼至上」今季大勇，有力挑戰。所以呢場左丁山揀8、5、3、6。中文大學新亞書院新院長（八月一日生效）信廣來教授正是現任中大「冼為堅中國文化講座教授」，左丁山一於捧冼博士場，投注佢名下嘅3號「友誼至上」！
第八場「愛彼錶女皇盃」係香港特區一國兩制之表徵，如果係一國一制嘅話，或者一國大於兩制，呢場賽事可能已經改名為「長城牌總書記盃」，呢場賽事只得九匹馬，外國馬有二號「百威勝」（英國），四號「壁虎夢」（南非），六號「永通達」（日本），「百威勝」係去年冠軍，今日呼聲甚高，可以一戰嘅係香港去年打吡冠軍一號「閒話一句」，三號「爆冷」及新科打吡冠軍4號「極品絲綢」，五號「好先生」極準繩可入位置，其他馬陪跑居多。大摩最喜歡在大賽揚威，適逢七場五號「步步穩」有機會一爭，買一注大摩孖寶，七場5射八場1補吓本都好。