官商勾結擺明車馬，喺香港，政教結合嘅氣味亦越嚟越濃烈，專收富豪名人信徒嘅金鐘港福堂，主任牧師吳宗文被指太河蟹，公開呼籲信徒服從當權者，又號召教友用白票反公投，因此惹來幾十名「宗教霸權關注行動」成員做嘢，上禮拜日踩上富貴教會港福堂示威抗議「河蟹牧師」。
遇示威人士滴晒汗
當日示威行動擾攘幾個鐘頭，吳牧師始終冇露面同示威人士對話，教會人員亦拒絕示威嘅教徒入場聽福音，但原來百密一疏，有漏網之魚，當日抗議行動後，有個參加者誤打誤撞，進入港福堂聽吳牧師講道。
有緣聽吳牧師講道嘅Carlson同八方講，當日港福堂崇拜冇乜異樣，同其他教會冇乜分別，後來吳宗文出場，同其他講者氣定神閒比較，Carlson形容吳牧師表情滴晒汗，好似好匆忙咁，並形容門外踩場示威人士係「不速之客」，所以佢唔會回應種種批評。
講唔夠幾句，吳宗文忽然學志雲大師玩感性，話其實自己已屆退休年齡，可以申請退休，決定留下來係想爭取更多機會向世人傳達真理，更表示近日承受一生最大壓力，Carlson話唔知吳牧師係咪博同情，但覺得佢想向教友表達自己處於不公平同受苦情況之中。
偶有談及政治話題
真的假不了，Carlson指吳牧師又指唔少教會都有同教友講吓時事政治話題，唔明點解偏偏港福堂被針對，講到港福堂四面楚歌，受到圍攻同面對好大磨難，更指撒旦派出使者降臨港福堂，比喻教會面臨好唔公平情況，要求教友為教會祈禱，希望教會盡快擺脫事件。據知宗教霸權關注行動暫未有新行動，吳牧師可鬆一口氣啦，八方則相信有真智慧嘅信徒冇咁易受引誘，應該睇得出魔鬼是誰。
mailto:[email protected]