隆成集團（1225）有5厘高息墊底，加埋受惠祖國龐大內銷因素，有得諗。隆成啱公佈09年度（12月底止）業績，每股末期息加到4.5仙（08年度3.5仙），而全年息率高達5.6厘，回報吸引到痹。又隆成09年度純利增長23%到7025萬銀，係金融海嘯下，製造業有呢個增長，相當唔錯。
仲要咁睇，祖國正係踏入第四次嬰兒潮，據統計單係祖國嬰、幼兒市場產值，就超過2000億人仔。隆成食住龐大內銷市場，積極發展嬰兒及幼兒用品零售市場，祖國業務會係嚟緊增長爆炸力所在。係咁易計數，隆成2010年及11年度純利只係Keep住20%增長，到8430萬銀及1億銀，11年預期PE得8.5倍，內銷部份計，隆成亦好吸引。博隆成上番12倍PE，現價1.16元要升41%，見1.64元。
泛店價殘燒冷灶
泛海酒店（292）未計上年9月以嚟嘅酒店及投資升值，最新NAV每股2.84元，現價0.53元，折讓高達81%。中港酒店股當中，相信無一家NAV折讓，有泛店咁大，泛店殘得交關。又呢期泛店啱發2010年度（3月底止）盈喜，講明會錄得可觀溢利。業績亦已經唔成問題，一於冷灶煲一煲，博泛店折讓係咁易收窄到75%，股價見0.71元，泛店係講緊要升34%。
錢雋