如果根據小超人李澤鉅「你叻仔咪有人工加囉」呢個邏輯，咁八方就真係有啲開始擔心「打工皇帝」和黃大班霍建寧，喺李超人父子心目中嘅地位。和黃新鮮出爐年報顯示，霍大班花紅連續兩年俾老闆cut，由07年高峯1.36億元，到08年減一成得番1.21億元，到09年就再減900萬，得番1.118億元，呢次減幅7.4%。連同其他津貼等總年薪，霍大班舊年袋1.24億元，減咗6.8%。
少900萬元花紅，唔夠買港島似樣啲豪宅，相信霍大班唔計較，至於乜嘢原因要再cut大班花紅，相信只得超人、小超人同大班自己至知。如果硬係要估的話，八方估大班可能忙住出唱片做歌星，掛住唱好自己唔記得唱好和黃。唔係亂估o架，早排業績發佈會，以前一向由大班負責嘅3G問題，竟然多番俾一向唔管電訊嘅大太子小超人搶答，台下議論紛紛，再諗多啲，唔知係咪有人就快退休呢？