周五16/04
唔夠莊家狡猾
下盤唔一定係冷門，看到英甲爭升班嘅米禾爾起勢落飛，結果受讓平/半最後敗走哈軍，學一齊中伏嘅藍鑽石話齋，莊家呢場開得叻！
閒贏指數：☆
周六17/04
放長線釣鯨魚
時間好、軍情足，日本波必定係小弟主攻賽事。長線跟都有失手時，今天用鯨魚做鋼膽就要損手了，最後1分鐘俾天鵝逼和。第2注曼城下盤，又係最後幾十秒俾曼聯史高斯篤爆咗；唞唞先，唔賭10點波，回家再捧車仔。唉，好少見到車仔踢成咁，真係俾曼聯嚇窒？個個讚熱刺好波，大家似乎忘記一個禮拜前，佢哋喺溫布萊輸畀老樸。
閒贏指數：☆☆
周日18/04
兵工廠輸波拍爛手掌
唔信自己賭日本波眼界咁差，點知呢日輸完以為鋼W嘅鹿角，再捧前鋒畀紅鑽送3蛋，呢兩巴打得我應咯。連主打嘅荷蘭波都冇心機買，結果竟然正路到開全熱門。諗住睇波不賭波，睇波樂趣多，結果同一眾同事見證今屆英超最騎呢嘅其中一場比賽，當兵工廠最後1分鐘俾韋根反勝3:2，我未見過輸波，大家喺公司拍爛手掌，你話幾失望。
閒贏指數：☆☆
周一19/04
否極泰來中波膽
手風唔順，點敢胡亂出手，不過小注博冷我更要拗氣點都要博紐記輸番次，哈哈，結果咪斷晒啲過關囉；近期場場臨尾香，今晚馬略卡補時入波贏兩粒，中番次波膽，轉運？
閒贏指數：☆☆☆
周二20/04
小注敲中國米3:1
從來唔信一注獨贏，贏梗呢個心魔一直給自己壓制住。雖然牽牛兄貼波中肯水準高，但我從來對自己貼大賽嘅水準有信心。今日佢貼巴塞，我點都買主場受讓嘅國米，立論一樣，單係賠率較冷配摩帥已極吸引，中埋3:1個30倍波膽，可惜我中正都係雞仔注啫。
閒贏指數：☆☆☆
周三21/04
又係鯨魚累事
又係鯨魚，將周二晚盈利全推平手盤，賽前仲係晨咁早就買咗，水份高啲自鳴得意；結果，完場前又俾三箭殺埋。冇晒信心賭歐聯咯，二串一買兩個[+1]里昂同侯城，玩完！
閒贏指數：☆☆☆
周四22/04
中馬體會W夠數
非一般星期四，馬體會對利記點可以錯過，讓球盤太犯本，小注捧主W，夠食！
閒贏指數：☆☆☆☆
值得跟進球隊：里昂（雖敗但搶鏡）、名古屋鯨魚（長線波唔會放棄）