審計署日前發表報告，勁插香港中樂團亂派演奏會門票同樂師蛇王等10宗罪，機構管治顯然好有問題，立法會帳目委員會噚日開會，據知議員決定跟進報告，徹查中樂團糊塗賬，另外亦會調查運輸署嘥錢興建搵鬼用嘅行人天橋、隧道，同埋有名無實環保園問題。
八方聽聞帳委會好可能傳召中樂團主席徐尉玲同行政總監錢敏華出席聆訊。徐尉玲係香港董事學會行政總裁，錢敏華係會員，董事學會宗旨係鼓勵會員齊心推廣優秀企業管治，又舉辦課程培訓董事，今次斷正俾審計署，兩人唔知使唔使報讀課程接受再培訓？徐尉玲係民建聯黨員，帳委會成員李慧琼面對黨友，聆訊時可能要避一避嘞。