國泰航空宣佈，五月二日之前，不會接受預訂往歐洲嘅機位，嘩，乜生意好成咁，個幾月內，班班機都爆滿？哎吔，苦笑喇，歐洲火山灰滿天，航空交通大混亂，害到航空公司雞毛鴨血，要清理疏導已受影響嘅乘客，都唔知道麻煩到幾時。未來幾個月，大家去歐洲嘅話，可免則免，旅行社當然叫苦連天。今季適逢好景，唔少人預備去歐洲旅行，如果因為航機「擠塞」而不能成行，損失最大嘅就係旅行社。
留英學生與家長亦為之紮紮跳。一位老友記因此向左丁山咆哮：「冇理由，冇理由，我個女趕唔切返倫敦呀！」返唔到就返唔到啦，唔通控告英航、國泰、維珍咩，航空公司都唔想嘅唧，家長不如慳番啖氣，鬧航空公司實在無謂。家長千祈唔好下下從自己立場出發，世界上有好多事係出自天意嘅！冰島人話火山爆發係上天幫冰島向歐洲報復㖭！金融海嘯令冰島破產記憶猶新也。
原來家長往往有錯覺嘅噃。好多家長每年開學之時都埋怨教科書太貴，向傳媒或消委會投訴。但實情唔少家長用於子女身上嘅錢，教科書遠遠少於補習或校巴費。鍾庭耀為出版商做咗一個調查，首先問，子女返學嘅最大五項費用係乜呢？家長憑印象答：（一）教科書，（二）補習，（三）課外活動/興趣班，（四）膳食費，（五）交通費。
調查員再問各項費用嘅銀碼範園（例如一千零一元至二千元），之後再統計排列，結果得出最主要嘅七項費用：（一）課外活動/興趣班，（二）補習費，（三）膳食費，（四）交通費，（五）教科書，（六）開學物資，（七）補充練習費。以小學中學家長之開支估計嘅平均費用作例子，課外活動/興趣班用9,842元，補習費用8,952元，膳食費4,936元，交通費用2,984元，教科書用2,902元，開學物資用1,901元，補充練習費用977元。比較之下，教科書費用佔全年教育與學習支出嘅9%而已。但點解家長往往認為教科書係最大支出呢？一個可能理由會係，教科書係每年八月嘅一次一筆過支出，而其他課外活動，補習費等等係分期每月付款，故此家長好記得用咗二千九百蚊買書，好肉痛，但唔記得每個月要用七、八百蚊去為子女交補習費！