八方同大家一樣，去長洲淨係知道可以在中環搭渡輪，噚日卻可以喺銅鑼灣上船，因為旅發局主席田北俊出動私伙百呎遊艇，請傳媒由銅鑼灣避風塘直達長洲，搞香港節慶年宣傳活動。
田少艘船名為ManhattanExpress，係意大利豪華遊艇品牌RIVA，10年前買價值千萬元計，田少話家要買嘅話，閒閒哋要4,000萬至5,000萬元。雖然船齡10年，不過成艘船勁新淨，有賴船員勤力打理，點解咁勤力？田少好坦白話：「因為個老闆好鬼緊張囉！」每月養船使費大約10幾萬元，包括請三個船員同兩萬幾蚊停泊費。
豪華遊艇咁矜貴，八方上船後唔敢輕舉妄動，恐防整污糟張枱、揩花扶手；一行人上船時將隨身物品、鞋放在船艙外，點知田少好緊張咁動手收拾，原來佢驚海水濺濕啲鞋，「擺埋啲，好易整濕o架。」船員聽到老闆咁講，慌忙幫手。
買新船又起大屋
噚日天氣甚好，藍天碧海坐遊艇去長洲，田少坐喺甲板曬太陽，十足TVB台慶戲《富貴門》大富大貴feel。見到大家頭髮俾海風吹到亂晒，田少忍唔住開聲：「你哋應該調轉頭坐。」大家大惑不解，田少親身示範：「嗱，咁坐咪順風，唔會吹亂啲頭髮。」佢仲有招「坐遊艇指定動作」醒大家，就係盤膝坐在甲板時，要雙手微微向後撐，「咁承托住，唔怕坐到腰痛。」有錢人即係有錢人，之不過八方學識咗，唔知幾時再用。
田少一家個個禮拜坐遊艇去西貢，有時會過埋夜，呢艘百呎遊艇有三間大房，實用面積見使過好多「豪宅」，足夠玩捉迷藏，不過田少嫌細，「因為三間房俾三個孫霸咗，我想瞓晏覺都冇得瞓。」據講佢已經訂咗架更大嘅新船，第日唔使「蝸居」百呎遊艇，可以有覺好瞓。海上「行宮」未落水，陸上府邸則入伙在望，去完長洲回程時，田少指住太平山頂，「有吊雞（起重機）嗰度呢，我起緊三幢（樓）呀！」
帶隊去長洲學整平安包
出動私伙遊艇，拉大隊山長水遠去長洲，田少都係為咗長洲大平清醮，噚日向「長洲包神」郭錦全師傅學師整平安包。整平安包幾十年嘅郭師傅初時好客氣，但落場無父子，睇見田少搓嘅麪粉唔對路，即刻成個師傅咁款，「好似差啲喎。」
「好似老婆咁彈手」
田少聽到嘴扁扁，即時發揮小宇宙，跟足師傅手勢，一手一嚿麪粉，左右開弓用陰力搓，果然搓到best，郭師傅都話：「OK呀，呢個合格呀。」田少好得戚：「唔好睇小我呀你班人。」嘩，點敢呀，最多都係心諗啫！
最後在包上打紅色「平安」印時，師傅教路唔使錫住個包可以出力啲，田少口花花話：「即係唔好當佢係老婆啦。」見到個包好有彈力，成個女仔面珠咁，佢形容：「好似老婆咁彈手喎。」「我係上海人，包雲吞就試過，整隻包係第一次，都唔係太難。」佢仲帶咗幾袋包返屋企畀家人試吓，仲話原來咁好玩，早知叫埋啲孫嚟。
可能去上海F1賽場飛車
田少對遊艇有要求，揸跑車更加考究，平日多數以法拉利同保時捷做「腳車」，年紀有番咁上下，佢強調唔係要飛車，追求速度感亦係後生時嘅事，愛揸supercar，其中一個原因係因為家住山頂，大馬力跑車上山保證夠力咁話。
去過德國學車
十幾廿年前試過morningdrive嘅田少噚日話，兒子早前「摟」佢到上海飛番轉，當然唔係飛街，而係去上海個F1賽車場，因為法拉利舉行trackday，請車主與愛車落場，田少話考慮緊去唔去，睇佢表情躍躍欲試，八方相信佢落場機會都好大。
有興趣去trackday，田少手車當然有番咁上下水平，原來佢18歲已經喺美國科羅拉多州雪地學車練甩尾，家潮興嘅drifting，佢幾廿年前已玩過，仲去過德國Porsche總壇學車。
mailto:[email protected]