憑《歲月神偷》成為出爐金像獎影帝的任達華，前晚在中環出席名店開幕活動，直言榮升影帝後，一切維持現狀，生活及拍片心態不變，片酬繼續有商量。華仔又透露得獎當晚與片中老婆吳君如興奮咀嘴，竟惹來女兒任晴佳呷醋，代媽咪琦琦出頭質問父親最愛是誰。
入行33年的任達華上周憑電影《歲月神偷》首登金像獎影帝寶座，之後即赴京拍電影，前晚他首次以影帝身份和太太琦琦到中環出席AlfredDunhillHome新店開幕活動。問到華仔有否將片酬加到影帝級？他說：「唔關事，要好劇本，可以商量，我拍戲嘅心態係冇變，就係拍好戲；生活都冇變，只係心情改變啫。」
收畫冊做禮物
華仔又謂有機會也希望能與出爐影后惠英紅合作，最好與吳君如三人一齊拍。他表示獲囡囡自製一本小書送給他做禮物，他說：「佢自己畫畫，畫咗成本書，再過膠包起送畀我，係佢五歲以嚟最認真嘅作品。」
琦琦則透露老公得獎當晚二人興奮傾偈傾天光，現時心情已平復，但華仔封帝後與君如咀嘴，卻惹來囡囡任晴佳呷醋，她說：「好好笑，佢話媽咪只係錫面，問爹哋鍾意邊個多啲，佢好單純。見到個獎座，又問點解個女仔條裙咁短，自己都想要一條，扮金像獎。」
前晚同場出席活動者，還有專程來港的吳尊，吸引逾百fans企滿街頭及對面商場，一見偶像即大聲尖叫。吳尊謂獲大會送贈兩套西裝，可與爸爸兩份穿，他說：「我很少穿西裝，爹哋身材跟我差不多。」
吳尊呻運動少
吳尊被問到父子倆誰的胸肌更勁時，他竟說是爸爸，他說：「因為我沒時間做運動，爹哋就一個星期做三、四天。」他透露近日忙於睇劇本及拍廣告。
採訪：羅慧敏
攝影：彭琮然
