泰國曼谷局勢進一步升溫，玩到榴彈喪炸高架鐵路Skytrain，都咪話唔得人驚，好似小妹呢啲自遊行旅客去親曼谷玩，10個有9個都係搭Skytrain。畀佢炸一炸，心口有個勇字、黑色警示都照去曼谷嘅自遊人港客，呢鋪應該都唔敢去啦啩。
加送太陽餅兌換券
東瀛遊執行董事禢國全話，以前淡季去曼谷旅行好鬼多，家搞成咁，好多自遊行旅客轉去台灣、日本等短遊地方，公司最近推出一個超筍盤益街坊，就係台中4日3夜套餐，機票連酒店包早餐，最平入住台中火車站附近嘅博奇大飯店，只係$1,199起（未計燃油附加費同稅）。小妹聽落都幾抵，兩年前我都去過台中，3日兩夜Package都要1,500蚊啦。
禢董笑笑口話，套餐仲送埋一連串兌換券，可以免費換領當地特產太陽餅小禮盒、草莓千層冰、法式手工薄餅等。仲可以優惠價260蚊參加包玩包食嘅新社小鎮薰衣草一天遊，連埋台中機場至酒店來回接送服務。
禢董又話，套餐仲好有彈性，如果啲客唔想3晚都住台中，想玩吓鄰近嘅地方，可以選擇入住有關景點嘅酒店，好似想玩埋清境，可入住嗰度嘅香格里拉空中花園，每房每晚只要加多240蚊起，想玩日月潭，就住水社海渡假旅店，每房每晚加170蚊起。
另一個筍盤係冲繩4日自遊行，價錢最平入住東橫軒那霸旭橋站前酒店，價錢3,299元起，如果喺下月13、20、27日同6月3、10、17及24日出發，每人可以再減200蚊。
電郵：mailto:[email protected]