在無綫劇集《搜下留情》內，馬德鐘和久休復出的陳慧珊與陳敏之發展三角戀，馬德鐘對能否與陳慧珊再續未了緣大賣關子。他在劇中艷福無邊咀戲連場，卻大嘆辛苦，直言寧願打死好過錫死，愛得理智的陳敏之則為保愛情，寧願做幸福蠢女人。
馬德鐘、陳敏之和陳慧珊在無綫劇《搜下留情》中，發展出一段三角戀，談到呢段關係，馬德鐘日前接受本報記者專訪時說：「劇中陳敏之係一個完美嘅女朋友，雖然佢係幫辦，我係沙展，好多人都話我襯佢唔起，不過敏之唔介意，仲對我好好，我諗觀眾睇完都讚呢個女仔冇得頂。」
馬德鐘呻苦
馬德鐘續說：「我同陳慧珊一齊就好似搵番自己，相處好開心，重拾自信。」問到今次會否再續《衝上雲霄》的未了緣？馬德鐘大賣關子笑說：「唔講得，就算你問我現實生活會點揀，我都怕自己嘅決定會透露咗個結局，我只可以話結局幾引人入勝、扣人心弦。」
提到劇中艷福無邊的接吻戲，馬德鐘竟大嘆辛苦，他說：「千祈唔好話益，其實男藝人拍呢啲戲真係辛苦，好彩今次同佢哋兩個熟，又互相信任，如果遇上啲唔熟好容易以為係想博懵，又或者走去借呢啲新聞做宣傳，咁就好麻煩，好彩我未遇過呢啲人，所以有時寧願打到死都唔想錫死。」
劇中被視為完美女友的陳敏之，講到女尊男卑的感情生活，有感而發地說：「雖然我覺得鍾意一個人，係唔計較階級同埋收入，但係諗深一層真係有問題，好似大家喺同一行做嘢，冇問題嗰陣梗係唔介意，但係個個男人都有自尊心，一旦有問題出現，再加埋身邊啲八婆去講，遲早會出事。」
要有上進心
陳敏之寧願做蠢女人，她說：「現實生活我諗我唔會選擇一個職級比我低嘅男友，我寧願揀一個有上進心又唔同行業嘅男人，大家返到屋企可以講其他嘢。我覺得有時做女人唔可以太強，所以我返到屋企即刻變咗第二個人，唔會太tough同精叻，點都係蠢女人幸福啲，如果女人太精叻最後傷害會大啲，所以我會選擇做弱者。」
採訪：何慧斯 攝影：仇志德
化妝：VenaofBeautyTech（陳敏之）
服裝提供：iiJin（陳敏之）
