老牌名校轉直資後，近幾年紛紛出盡法寶籌款重建或擴建校舍，規模越來越大，設施豪華兼多元化，以拔萃男書院為例，耗資1.2億元興建嘅「超級宿舍」，唔只有環迴九龍半島靚景，仲有一個設有6條泳道嘅全天候室內游泳池，又有個建造費幾千萬元音樂廳，聽落係唔係好似附設超豪會所嘅豪宅呢！
紛建泳池體育館
另一傳統名校聖保羅男女中學動用3億元擴建校舍，新建四層高宿舍；聖保羅書院幾年前已擴建校舍，有新教學大樓同體育館，非一般中學可以匹敵。歷史悠久嘅愛國學校，近年都致力改善校園設施，沙田培僑書院獲四叔李兆基捐錢逾千萬元興建泳池，最特別係有傷殘人士專用更衣室。
其他新進直資學校，好似保良局顏寶鈴書院、林大輝中學都要趕上馬興建泳池體育館。直資學校咁落本，無非覬覦日後有機會吸引內地生入讀，就好似發展商起豪宅主攻內地富豪，直資校都要北望。