名校生活，除了環境和師資，更重要是全體師生對學校的歸屬感。香港第一間官立學校──銅鑼灣皇仁書院將於2012年創校150周年，經歷一個半世紀，人才輩出。故皇仁舊生會邀請中大歷史系開展為期30個月的研究，邀請各代「皇仁仔」口述歷史，再製成出版物。與其齋睇歷史書，不如邀舊生當導遊！
記者：蔡俊業
攝影：陳盛臣、部份圖片由皇仁書院及
皇仁舊生會提供
湯家驊Profile：
1969年在皇仁書院畢業，後入讀港大法律系，曾擔任大律師公會主席，現任公民黨立法會議員。
波牛
皇仁仔跟一般學生無異，都會用塗改液在凳上寫字。
領袖生
皇仁薯頭識女仔
上個周末皇仁OpenDay「開倉」，小記跟湯家驊（Ronny）來到皇仁高士威道正門。跨過頭上掛着兩塊「QC」的正門和兩旁簇擁的學生群，旅程開始。問湯家驊，作為港島區名校生，必定有女學生做擁躉啦？原來唔係，「我哋叫福友行嘛，即係好薯囉！」咁到底有幾薯先？聽另一位舊生──候任中大校長的沈祖堯講，當年皇仁學生都來自草根階層，沒錢買新校服，只會穿吊腳褲返學，而且此校傳統以來都是白衫白褲，放學之後又會做波牛，經塵土洗禮，白貓都未必幫到手，附近女生自然看不上眼。
外表輸人一截，但勝在讀書成績勁，集腋成裘總有計仔，就是每年在禮堂舉行的AnnualBall，成為一年一度的結識異性的場地。剛巧Ronny遇上師弟──現屆舊生會會長陸偉雄，兩條佬憶述舊事，陸：「當年佢哋搞AnnualBall識女仔嘅事，成日都聽佢哋講，因為我七十年代入學，當年校長榮德淵唔畀搞！」學長Ronny說，當年只有高年級皇仁仔才可以搞舞會，要識女仔就要出擊，一班皇仁仔會以學校名義，派出HeadPrefect等代表向對方索取女生名單，「因為事前好多嘢要傾要搞Pair-up（配對），我哋就詐詐諦諦同佢哋去食飯。」這就是作為搞手的最大着數。數數手指，曾經邀請過哪幾間女校開Ball？「試過請St.PaulConvent（聖保祿學校），又試過請跑馬地的Maryknoll，即現在的瑪利曼，最後一年就請St.Mary（聖瑪利），點解咁深刻呢，因為當年有幾個同學就借辦舞會識咗幾個女仔，之後都有拍拖。」
Ronny對於那個年代的St.Mary女生印象相當好，「那個年代，我哋覺得St.Mary同Maryknoll最靚女！」但後者較高竇，「佢哋覺得我哋好薯唔夠潮……或者唔係高竇，而係唔夾啦。」陸笑言：「皇仁仔唔係好識招呼人，因為無堂上，哈哈！」結果將目標轉移到其他學校！「以前天后港鐵站對出那個位置有幾家茶餐廳，有間叫英皇茶餐廳，晏晝庇理羅士嘅女仔就會落去食嘢，我哋就落埋去，要搭枱，有啲人就係去識女仔，我都有跟埋去！」
天文學會磨玻璃做望遠鏡
皇仁仔讀書勁係人都知，但都要懂得搵方法放鬆。舞會一年得一次，而且還要看校長是否准許，除了打波，他們還會搞其他活動，當中天文學會就最出名。Ronny說：「當年天文學會歷史悠久，好出名，入會第一件事就係磨玻璃！」當年資金和器材有限，所以要睇星？麻煩大家出出力將它磨薄，變成望遠鏡。「係一塊好厚嘅玻璃，磨到手都跛！」
採訪當日是開放日，天文學會都有開檔介紹一下，九十後的現屆會長招日成同學便為這項古老活動作補充：「係用一塊用瀝青模，用重物壓下去，再加拋光粉，將玻璃磨薄，3年前陳Sir（天文學會主任陳玉麟），出產咗一個直徑30吋，全世界最大的手製天文望遠鏡。」犀利犀利！
但講到犀利，又怎可以不說皇仁書院的收藏，事關過去150年，單是畢業生都已經數以萬計，而且不少都是現時的社會菁英或權威人士，除了Ronny是大律師和立法會議員，還有國父孫中山、全國政協副主席霍英東、「華叔」司徒華、律政司司長黃仁龍等等等等，所以當年曾經用相機紀錄過的皇仁舊相簿和文字紀錄，絕對是研究本土歷史的重要。
負責今次大型歷史研究的中大歷史系系主任梁元生，擅長研究教育史，曾負責為英華書院及上海中西書院作歷史研究，他說今次皇仁研究將分三個部份：（1）創校至二次大戰前的早期歷史、（2）1950年皇仁復校之後，和（3）現代皇仁的發展。當中以第二部份最重要，梁主任說：「二次大戰光復香港，1950年皇仁復校後，四班學生合共約200名師生曾經有張大合照，當中有不少都是為香港的戰後建設扮演重要角色，所以我們透過舊生會幫手，聯絡他們，由他們口述昔日歷史。」雖然距離150周年校慶尚有30個月時間，但他指因為1950年那班學生現在都已經七、八十歲，要他們口述歷史將花很大工夫，故擔心30個月時間研究甚為緊逼。而待所有資料齊全後，亦將會推出出版物，留傳後世。
二樓尋回舊作：「讀書時美術老師好鍾意我，搵我幫手畫呢幅紀念孫中山一百周年嘅畫。」畫於1965年，那年仍未叫Ronny。
兩代天文學會會長在觀星臺相遇：左邊是現屆的招日成，中間抱BB的陳先生九十年代亦曾擔任會長一職。後方的望遠鏡連接互聯網，可在家中觀星，耗資達百萬元。
皇仁於1862年創立，原名中央書院，立於歌賦街，後來於1889年遷往荷李活道和鴨巴甸街（見圖），在二次大戰期間遭日軍破壞，1950年正式遷往銅鑼灣現址。
