海洋公園噚日再次獲內地送贈10條中華鱘，當中包括3條小妹同好多港人見到會熟口熟面嘅、即係喺香港養養吓突然死咗幾條同伴，之後送番廈門療養嘅嗰批囉。至於另外7條，就由內地單位送出，噚日由廈門出發嚟香港，準備進駐海洋公園嘅中華鱘館，配合個館6月開幕。
入場費唔會加價
10條國寶年齡由兩歲到10歲，最長嗰條兩米咁長，佢哋抵港之後，要按規定過一個月檢疫期，跟住就會同胭脂魚、圓口銅魚、白甲魚等等好多款長江特有淡水魚種，一齊做保育大使，喺中華鱘館同香港人見面。小妹問過海洋公園會唔會因為有國寶到要加價，得知入場費不變。
海洋公園又噚日趁地球日，去咗福建廈門搞咗場中華鱘放流活動，即係放生超過108條國寶入九龍江一帶海域，當中仲有4條裝咗衞星追蹤器嘅中華鱘。海洋公園透過保育基金贊助中華鱘衞星追蹤計劃，話要研究中華鱘喺自然環境中嘅行為同活動，幫助保育自然生態。
電郵：mailto:[email protected]
