無綫新聞被冠上CCTVB稱號後，情況同近日天氣差唔多，漫天風雨。高級監製區家麟（圖）早前遞信，6月起身，重返校園讀博士。無綫中人強調呢個係區家麟個人決定，絕對同搞改革或六嬸「咳」budget傳聞無關。
線人又話暫時未索到邊個接佢個位，區家麟近期佳作係改革晚間《天氣報告》，獨具慧眼挑選兼特訓黃婉曼做天氣女郎，一句「跳出香港」加上甜美笑容，令天氣報告收視驟升，黃婉曼人氣亦十分hot。
據講無綫高層對傍晚6點半新聞收視有危機感，上半部收視有15點左右，比以前跌一、兩點，第二部份回升至16、17點，難怪下月初要改革6點半新聞，如果區家麟唔走，應該有好橋谷收視；而11點晚間新聞收視達23點，相信係歷來同一時段最高收視。區家麟做過史丹福大學奈特新聞學人，曾奪Peabody新聞獎，中大畢業後就入無綫，離離合合20年。