170小時手做內櫳　賓利移動皇宮

賓利最豪嘅Mulsanne終在港現身，作為2010重頭戲，豪華內裝絕對多到數唔晒，最重要係堅持英式手工藝技術，莫講話車身用人手噴塗同拋光，內飾一裝一嵌、一針一線，更係花上170小時精雕細琢而成，坐上去唔覺係冷冰冰一架車，簡直如身處會行會走嘅宮殿之內。

記者：徐影龍
攝影：林栢鈞
Model：Michelle@PureModels

Mulsanne設計概念嚟自五十年代嘅賓利S-Type，最明顯係方形鬼面罩、四圓頭燈同特長車頭等，車價五百幾萬，極級豪華已屬指定動作，反而性能上叫人有另一番驚喜。原來賓利贏過6次利曼24小時耐力賽，而賽道上大直路後第一個彎角，就係聞名嘅Mulsanne彎，新車以此為名，的確有意思。以賽道彎角命名，性能上點會失禮於人？Mulsanne配備6.75LV8引擎，步大力雄沉穩有勁，加埋雙Turbo增壓，爆發力更係驚人，就算車身重達2.6噸，0-100km/h都只係需時5.3秒，成績拍得住跑車級數。
值得注意係賓利最着重嘅扭力表現，1,020Nm已令人看儍眼，仲要係千多轉就上到最大扭力，即係輕輕吊住油門，已可順住上到8波，引擎低運轉令車廂更為寧靜，環境許可嘅話，飆到極速296km/h，坐喺後座嘅老細都未必察覺得到。

■車尾線條及骨位圓直有致，充滿英式風格。

■超巨20"胎軨，難得有霸氣得嚟亦不失高貴感。

■Mulsanne設計意念
嚟自五十年代經典
S-Type。

英式品味Feel得到

512匹馬力同極速296km/h，喺香港都幾難發揮，對老闆嚟講，典雅品味同豪華裝備先最重要。Mulsanne喺大部份內裝上，都用人手製造同裝嵌，每架車單計內櫳，已需動工170粒鐘，包括木材飾板打磨、真皮座椅一針一線咁鑲嵌，坐上去絕對Feel到英式手工藝嘅品味，唔會似工廠倒模式機械裝嵌咁冷冰冰。
叫得移動皇宮，幾乎諗到嘅豪華設備都有齊，前後排都係電控調校唔算勁，可以12方向微調，連腰部支撐位都考慮埋，仲有雙層特厚軟熟地毯、腳邊冷氣風口、高身收納式茶几，連尾箱都鑲埋真皮同鋪設地毯，咁多細微位都照顧周到，呢啲先真正叫人窩心。Mulsanne娛樂設備亦夠Update，除8"高清屏幕同20個靚聲喇叭外，仲內置60GB硬碟、iPhone及USB插頭等，充滿聲畫享受。