空運P退休前坐飛機多過左丁山搭地鐵，退休後仍然不斷咁飛，到處旅行，與左丁山呢個經常留港消費嘅本土港燦，不可同日而語。星期六早上，突然收到空運P電話，傳遞兩個訊息，第一點就係佢贊同「安居蝸居」嘅觀點，佢對星加坡非常熟悉，歷年到星加坡次數之多，已經數唔清，佢認為星加坡人無錯係住得比香港舒服好多，但兩地政治環境完全唔同，唔可以比較。第二點就係佢在網上睇到最近國泰航空CX780航班自印尼泗水回港，緊急降落赤鱲角機場一事，安全着陸，只有九名乘客受傷，認為係奇蹟，機師值得一讚。
左丁山o架o架笑對佢講：「你大概啱啱返到嚟，香港有人大駡飛機師（一）點解起飛，（二）點解知道有事後唔向乘客宣佈，（三）點解唔飛去就近機場如越南、海南降落而要飛返香港呀？」空運P為之愕然，回答話：「對上一次（即2009年1月15日）有一位美國機師對航機緊急降於紐約赫遜河，全美國讚機師為英雄，有乜理由香港有人鬧國泰機師呀？以我嘅空運界經驗講，緊急着陸嘅危險程度其實更高，我就認為佢哋係英雄嘞，你可以上網睇吓外國報紙點講。」哦，與空運P講完電話，睇副刊〈名采〉，陳也寫國泰航機「硬着陸」一事（四月十七日「頂級頂肺」），真係睇到好頂癮，笑餐飽，食麪包早餐都食少一塊，空運P相信都會睇到啩。
聽佢之言，上網望一望，英國《太陽報》有條標題「Jet's'noengines'landing」:Twoheropilotssaved322...（按322指機上乘客加機組人員），《每日郵報》網上版亦指兩位正副機師係英雄。飛機師須經長期訓練及積累飛行經驗，佢哋對飛機安全問題，比任何一位乘客都更加着緊，世界上冇一個機師會罔顧安全而亂咁起飛嘅，上咗天空之後，機師就全權負責飛行安全，為咗避免乘客慌亂，在下降前二十分鐘知道引擎出現嚴重問題，生死懸於一線之間，必須全神貫注將飛機安全着陸，與機場緊密聯絡，邊度可以分心通知乘客吖。一位工程師學會嘅黃博士在now電視節目講，國泰航機着陸事件充份顯示香港之基本價值，就係各部門訓練有素，二十分鐘之內機場控制塔及地面救援人員與機師百分百配合，應記一功，如果在其他機場降落，可能要靠撞彩！