消費blog:超巿姊妹店搶錢

消費blog:超巿姊妹店搶錢

家啲超巿集團好鍾意開啲唔同招牌嘅連鎖超巿,分搶低、中、高檔巿場,小妹有時行呢啲同一個老闆嘅超巿,佢哋都會賣同一款貨品。消委會前日放蛇格價,發現同一集團旗下唔同超巿賣嘅同一款食品,價錢可以相差超過八成,咁樣食水都好深啫。

消委會格價踢爆

俾消委會派人格價嘅中環同半山區,牛奶國際旗下就有4間唔同超巿,分別係惠康、MarketPlacebyJasons、ThreeSixty同Oliver'sDelicatessen。19項格價食品,Oliver's有6樣賣得最貴,榮獲「至貴王」,最搶錢係Oliver's同其他三家姊妹店同樣有賣嘅16款食品,14款都係佢賣得最貴;而MarketPlacebyJasons、ThreeSixty賣嘅貨品,又貴過惠康。
睇番啲格價數據,Oliver's比惠康賣嘅同款食品普遍貴兩成,差幅最大嘅頭三樣食品:金寶滋選田園雜菜湯18.8安士罐頭、FilippoBerio初榨純橄欖油1公升裝、史雲生清雞湯1公升,Oliver's比惠康貴咗分別係86%、79%同56%;金額相差最大嘅Filippo橄欖油,Oliver's賣152蚊,惠康賣85蚊,足足貴咗67蚊,食個扒餐都仲有錢找。小妹建議大家去高檔超巿買嘢時,千祈唔好諗住順便就買埋啲街坊超巿都有得買嘅貨品,否則隨時買貴嘢。

電郵:mailto:[email protected]