政府上禮拜三發表政改「爛方案」，無普選承諾，得個吹字，市民唔嬲勢係假。但係政府冇嘢多，就係錢同蠶蟲師爺一大籮，政制及內地事務局今日喺《蘋果》同其他報紙刊登兩個廣告，硬銷佢哋套爛方案，爭奪民意戰有殺錯冇放過。
當局大賣廣告
個廣告設計好簡單，都係紅白分明一個大字，一個就信字冇咗個口，呼籲大家減少口舌之爭，另一個就行字唔見咗個人，叫市民行一步支持政改方案。政制局冇透露花咗幾錢賣廣告，只表示係政府宣傳2012政制方案一部份，希望各界支持政制向前發展。
五區公投運動總發言人余若薇同八方講，呢兩個廣告其實唔簡單，個行字冇咗個人，其實係叫市民記得喺5.16行去投票站支持普選；至於個冇口嘅信字，就梗係代表煲呔言而無信冇口齒，07年仲話會「玩鋪勁」，轉個頭又係得個桔。余大狀又話，政府做嘢夠晒均真，嗰頭零宣傳冷待成個公投補選，呢頭又賣廣告推銷政改方案，信佢一成，真係雙目失明。
每一票都重要
政府玩拆字，八方都送番個字（圖）畀大家，就係一個冇一劃嘅票字，提醒大家每一票都好重要，差你一票，真普選就可能成為無了期空中樓閣，仲有唔夠一個月就係公投大日子，唔想再俾中共呃鬼，每一個人都要行出嚟撐真普選。5.16，公投見！
mailto:[email protected]