雖然外圍市況無乜大礙，但港股昨日表現認真麻麻，升幅全部抵銷之餘，臨尾市仲要倒跌過百點，大市再次失守20日線。潛在利淡消息唔少，散戶一般估計都係圍繞內地打壓樓市方面，事關樓市一淡靜，內需都幾難推動，所以港股市況似乎真係行先中美股市。
股海氣氛看似一般，但炒股不炒市呢一招家陣幾掂，唔少股份照樣在逆風中飛揚，好似目前已貴為內地玉米澱粉龍頭的中國澱粉（3838），近期股價又再伺機而動，昨日續升2.6%，收報1.57元，走勢一直沿着今年2月初低位1.18元延伸的上升軌前進，臨近業績公佈，估計後市可藉機炒上，重返年初高位1.80元水平，可吼位買入，止蝕位1.40元。
內地有研究報告指，中澱目前在玉米澱粉行業市佔率達17.4%，全國排名第一。集團年產能將於兩年內由85萬噸增至165萬噸，產品售價平均比同業高逾4%，生產技術及管理亦冠於對手，龍頭地位穩固。預期中澱成績表應有不俗表現，不妨睇實。
方星俠