明末清初著名畫家石濤作品多數只喺博物館見到，但佢嘅畫冊《杜甫詩意冊》將在港拍賣，估價達1.2億元，係中國古代書畫拍賣歷來最高估價。
佳士得副總裁游世勳話，出家人石濤同八大山人都係清代創新派畫家，當時正統派講求臨摹，石濤卻鍾意登山臨水，「搜盡奇峯打草稿」，將所見所聞以創新筆法表達，如畫冊嘅作品，石山唔似正統派筆法「皴法」咁，講求線條清晰，線條反而喺水墨間隱隱約約，石頭更立體。
活用乾筆
畫冊都睇到石濤多變畫風，如用水墨將狂風暴雨繪畫活靈活現，百幾年後仍有濕潤感，但佢又活用乾筆，好有神采但冇一般乾筆嘅燥感。畫冊四十年代起由一亞洲藏家擁有，過去半世紀從未公開，5月28日喺會展嘅佳士得春季拍賣會拍賣，26、27日預展。