好多職業足球員都有紋身，好似靚佬碧咸咁，佢上身同兩隻手都紋晒一啲有特別意思嘅圖案。至於效力利物浦嘅丹麥國腳中堅丹尼爾艾格，亦好似碧咸咁紋到成身都係，但唔講你唔知，原來佢係個合資格嘅紋身師傅，隨時可以打開門口做生意。
現年25歲、喺06年1月由丹麥球隊邦比以580萬鎊（約6,840萬港紙）加盟利物浦嘅丹尼爾艾格，本身超鍾意紋身，喺右上臂、左手、背脊同心口紋咗不同嘅圖案。佢曾經講過，話如果利物浦攞到英超冠軍，就會將全隊球員嘅名紋晒上身；但利記今季爭標無望，所以佢呢個承諾，最快要到明年夏天先有機會兌現。
免費為利記隊友紋身
除咗俾人紋身，原來丹尼爾艾格都會落手落腳幫其他人紋身。喺未加盟利物浦之前，佢已經係一個合資格嘅紋身師傅，仲試過喺接受雜誌訪問時親身示範點樣紋身；佢仲話自己一得閒，就會設計一啲紋身圖案。
聽利物浦啲人話，丹尼爾艾格好樂意幫隊友免費紋身，仲話會幫佢哋設計獨一無二嘅圖案，包唔會同人撞款；利記啲人咁講：「隊中較為年長嘅球員對紋身有啲抗拒，但有紋開嘅就好似對佢嘅構思有啲興趣。」唔知都好紋身、喺右下臂紋咗個「9」字嘅費蘭度托利斯，身上有冇丹尼爾艾格嘅手筆呢？
過多十年八年掛靴唔踢波後，睇嚟丹尼爾艾格真係會向呢方面發展，由職業足球員變身全職紋身師傅；聽聞佢喺家鄉丹麥同阿叔夾份開咗間酒吧，唔知佢會唔會幫間吧搞個主題，做「紋身酒吧」呢？
丹尼爾艾格小檔案
國籍：丹麥
出生日期：12/12/1984（25歲）
現效球會：利物浦
身高：1米90
體重：83公斤
位置：中堅/左後衞