綽號「米老鼠」嘅投資推廣署前署長盧維思退休後出書，大爆當年維港巨星匯爛show內情，揭露唐英年想卸隻鑊畀下屬，據講本書洛陽紙貴。米老鼠一於添食，出埋中文版《問責不問責－巨星匯的真相》，前言好鬼有80後反建制情懷，話新書「獻給全香港市民，他們理應有一個比現在更好的政府。」
八方聽聞米老鼠送咗本新書去禮賓府畀舊上司兼老友煲呔，有人睇完後卻指本書冇揭露更多醜聞，嫌冇料到！
如果只係英譯中就抵噓啦，不過米老鼠好歹做過投資推廣署署長，總有辦法推銷本書，因此中文版加入與作者「真情對話」，八方先睹為快，結論係退休高官都係官，都係兩個口。