大學教資會最快今日審議城大開辦獸醫學院事宜，由於教資會高層已經表態反對，相信申請凍過水。城大校董會主席係行會召集人梁振英，教資會主席史美倫亦坐係行會，件事搞到公開掰面，已經好耐人尋味，背後一場公關戰都好精采。
城大禮聘前政務司司長肥龍舊部HeidiKwan（關鄭麗敏）嘅公關公司做推手，教資會則由公關界名人香樹輝嘅「靈活聯繫」spin輿論，公關界大姐、大哥過招，輸贏冇所謂，求財啫。高教界指今次城大衰在事先張揚，想畀壓力教資會先至遭到打壓，不過幾年前中大開法律學院，點解又冇傷和氣呢？有人指當時李國章係教統局局長，中大有齊天時、地利、人和，自然水到渠成啦。