今年係世界盃年，世盃決賽周仍然是4年一次，但對有些少年資的球迷來講，現時睇世盃跟以前已截然不同。
以前睇世界盃，鬧鐘是必備之物。去到淘汰賽就半夜開波，半夜波最難捱的是開波前那幾粒鐘；本來睇電視是消磨時間的最佳方法，不過電視台卻大整蠱，開波前不時重播鬼故，睇完鬼故唔驚就假，仲點可能繼續睇世盃？故只好校好鬧鐘，半夜起身睇波。不過今時今日，無論男女老幼，睇半夜波之前大把節目，若然唔喜歡打機或者上網，可以煲碟或者睇收費電視，總有一樣可以幫到你。如果是收夜的，更加毋須為搵節目而煩惱，返到屋企之後，還有時間冲個凉，然後才坐定定睇波。
除了鬧鐘，以前睇世盃，冇高清亦冇3D，只有標清，視覺效果雖然差少少，但至低限度是完全免費（電費另計）；而且有選擇，可以收看三色台或者絲帶台，不像現時由一台獨播，且更屬收費電視台。絲帶台長期積弱，連播世盃都吸引唔到觀眾。最記得在90年一屆，絲帶台為了刺激收視搞很多花臣，除了由分組賽開始已Cut走所有廣告，又找來了曾志偉及陳百祥等對足球有研究的藝人，以及已故名嘴黃霑，再加上經已過身的資深評述員林尚義，令整個節目原汁原味，兼且在變得搞笑的同時，亦不失專業。
今屆世界盃冇得揀，又要繼續俾錢睇，但據聞有戲院斟緊直播，甚至會播3D版；在戲院睇波，氣氛不會比在酒吧睇差，而且勝在坐得舒服。如果真係成事又有時間兼約到三五知己，一試無妨。
文：青蛙仔