錯估03年7.1上街人數，被指間接送老董一程嘅中央政策組揸fit人劉兆佳教授，幾年嚟受盡學術界白眼，飽受各界非議，在特區權力核心靠邊站。事隔幾年，佳叔終於吐氣揚眉，早前發表文章，指香港人家陣「坐困愁城」，高人偉論果然鞭辟入裏、一語中的。
李卓人妻滯日內瓦
並非八方吹捧佳叔，事實上佳叔今次真係開口中，皆因好多高官子女復活節回港度假，卻因火山爆發返唔到英國開學，全人類企晒喺度，仲唔係坐困愁城？只係唔知佳叔有乜解救良方啫。天災影響無分階級，高官仔女歸程無期，工會領袖也有家歸不得。
立法會議員李卓人妻子、職工盟總幹事鄧燕娥上星期到日內瓦，出席國際勞工組織討論簽署家務工國際公約嘅預備會議，原定上星期五晚9點鐘機離開，點知晚黑7點宣佈關閉機場，歸心似箭嘅娥姐望機興嘆，「只係差兩個鐘頭，我就可以返到香港。」
娥姐透過長途電話同八方講，當地機場立立亂，佢連日向航空公司查詢，初時話18號有機位，後來要押後至21號，噚日最新消息係最快星期六24號先有機走，當日能否上機，坐困愁城嘅娥姐坦言唔敢抱太大期望，「好似話有一大嚿火山灰嚟緊，可能又要封機場。」
人人想辦法返屋企
滯留異地，娥姐話好彩有工會朋友照應，可以到工會辦公室做啲文書工作，總算有個地方落腳打發時間。其他一齊開會嘅工會人士，如果來自歐洲國家，可以租車自駕回祖家，不過租金3,000歐羅一日；有幾個來自俄羅斯嘅工會領袖就慘嘞，人地生疏兼言語不通，「佢哋想買火車票返莫斯科，點知最快要5月1號先有位。」
老婆有難，阿人都要幫忙撲機位，佢當然希望老婆平安歸來，但何時回港，真係望天打卦。睇得出冰島爆火山人人坐困愁城，佳叔不愧料事如神，呢位特區第一生神仙，測得準香港幾時民怨大爆發嗎？
mailto:[email protected]