好多男人都想睇靚女剝衫，如果羅馬贏到今季意甲，就可能有意大利女星當眾跳脫衣舞；嚟緊4輪聯賽，唔淨止羅馬球員會搏老命，我求大俠相信意大利全國嘅男人，都會落力幫羅馬打氣。
猶記得00/01球季，有「羅馬教母」之稱嘅意大利女星費里莉，喺羅馬贏咗意甲後兌現承諾，喺羅馬市中心最大嘅噴泉許願池前當眾跳脫衣舞，吸引逾460萬人坐定定喺電視前欣賞；事隔9年，佢又出剝衫呢招激勵羅馬，但今次仲激，事關隨時有多幾條女同佢一齊剝。
話說費里莉喺一次電話訪問中，節目主持文托拉提議如果季初打得唔好嘅羅馬可以後上封王，佢就當眾跳脫衣舞慶祝；費里莉一口應承，仲叫埋文托拉一齊剝，但文托拉就話要啲時間諗諗。
「唔會遮住重要部位」
費里莉呢次剝衫撐羅馬嘅行動，仲獲得其他女星支持；本身係演員、歌手、舞蹈家同節目主持嘅庫卡里尼就話：「如果羅馬奪冠，我會學費里莉跳脫衣舞慶祝，而且唔會用吉他遮住重要部位。」
所謂一呼百應，另一意大利女星阿庫里亦表示會加入呢個剝衫行動；阿庫里同意大利嘅《信息報》講：「我知道費里莉諗住為羅馬剝衫，而庫卡里尼都計劃咁做，所以我會同佢哋一齊剝！」除咗佢哋3個，杰里尼亦獲邀參加；杰里尼話：「我接到邀請，喺羅馬奪冠時參加呢個脫衣舞活動。」
雖則費里莉到6月就滿46歲，青春少艾冇佢份，但徐娘半老仲keep到；加埋隨時多4個身材豐滿嘅靚女同佢齊齊剝，你話冇吸引力就假，收視隨時突破之前嘅460萬。羅馬家陣34戰得71分，領先衞冕嘅國際米蘭1分，比AC米蘭多7分，我求大俠為咗睇4美剝衫，梗係撐羅馬啦！但希望羅馬隊長托迪咪再好似喺對拉素場波咁，向對手球迷做啲唔禮貌手勢，今次唔使停賽，只係被罰兩萬歐元，算佢執到。