俄鋁（486）上個禮拜公佈，向大股東兼行政總裁（CEO）歐柏嘉發行5062.5萬股新股，作為獎賞佢有份成功安排公司上市嘅巨額花紅，隨即引嚟市場議論紛紛。不過呢位俄羅斯首富學習能力好強，即刻向滙控（005）同渣打（2888）高層偷師，學佢哋行政總裁捐花紅呢招，話會將今次所獲花紅當中嘅三分之二（市值差唔多2憶）捐出嚟做善事。
股份市值3.3億 兩年後捐2/3
噚日俄鋁收9.74元，善款市值應該有成3.29億。但呢批股份有兩年鎖定期，佢噚日喺莫斯科話，到時會沽售套現，捐畀佢名下嘅慈善基金，用嚟協助俄鋁有經營業務嘅20個俄羅斯城市地區。
不過歐柏嘉認為，自己得到呢筆花紅係物有所值，事關佢將俄鋁由舊年負資產100億美元，改善到今日成為價值200億美元嘅上市公司，其間冇唔見任何一項資產，仲重組埋產能，令公司成為全球同業生產成本最低嘅鋁商。
對於佢嘅底薪遠高過同業水平，佢話自己要飛去尼日利亞拯救被挾持嘅俄鋁員工，又要喺零下42度嘅西伯利亞巡視建設工程點都辛苦過嗰啲坐喺倫敦紐約做嘢、夜晚7點就着住拖鞋坐喺屋企嘅企業精英，佢咁講，無非想話畀大家聽佢「貴得有道理」唧！
李華華
mailto:[email protected]