暑假就快殺到，新航率先出招劈價一半推出特價機票，嚇親業界；近年深受美少女歡迎嘅韓國亦有回應，由韓國訪問年委員會秘書長盧永雨領軍下，噚日率領咗成40幾人代表團嚟香港，推介為期三年嘅韓國訪問年（VisitKoreaYear）吸港客，仲搵埋人氣女子組合Hotcha做旅遊大使，要將一眾80後、90後、宅男一網打盡。
五折遊博物館
盧永雨同小妹講，韓國好重視香港旅客，舊年金融海嘯未結束，到韓國旅行嘅港人不跌反升35%，即係多咗21萬人。
今年韓國訪問年三大重頭慶節，包括慶州韓流慶典、全州韓國美食慶典同釜山煙花慶典；另有連串嘅旅遊優惠，好似7、8月暑假，喺首爾、仁川舉行KoreaGrandSale，多達1.5萬間商戶參加，好多仲會提供折扣優惠，至於博物館同古宮等文化設施，門票有5折優惠。入住指定酒店住三晚，多送一晚㖭。詳情可以click入韓國訪問年網站 http://visitkoreayear.com。
啱啱去完韓國掃貨嘅Hotcha噚日着住傳統韓服發揮大使本色，佢同小妹如數家珍話，掃名牌最好去狎鷗亭，掃潮流服飾就要去梨花女子大學，仲要記住順便飲杯啡食件蛋糕。佢哋講到興起，仲炮製韓國地道小食如紫菜包飯、韓式炒粉絲畀小妹試，食落OK喎。
電郵：mailto:[email protected]