港甲地區球隊沙田，喺2月炒咗嘅匈牙利外援基斯（圖）有手尾要跟。據介紹基斯畀沙田嘅足球經紀徐援話，沙田要求基斯減人工，同隊裏面幾個外援一齊住，佢要做廳長，最後仲要炒埋佢；呢單勞資糾紛，雙方噚日首次喺勞工處仲裁，但傾唔掂數，案件排咗喺下月18日由勞工法庭仲裁，到時睇吓法庭點判。
徐援話，基斯山長水遠嚟到香港搵食，點知俾沙田要求減到得番萬零蚊人工，最終仲要炒埋；佢曾經諗過就咁返歸，仲要告諸同鄉，叫佢哋唔好再嚟香港搵食。不過，家陣寄居喺友人南丫島屋企嘅基斯好鍾意香港，呢輪已經改跟公民操練，希望下屆可以留港落班。