高盛事件再加內地打壓樓市，已令股海淡風瀰漫，唔少股友都對後市睇法重新調整。投資觀點面臨嚴峻挑戰，能否經得起考驗真係要時間去證明，好似前陣子坊間唔少「財經演員」觀點，認為第二季港股形勢應已擺脫首季陰影，但家陣似乎又要改口風？
大市無論升定跌，一樣有股票炒，好似杏林醫療（8130）又炒高16%收0.151元，成交額仲超過5億元，以一隻股仔而言都算誇張。所以話，點會冇股票炒？
勝利管道（1080）去年業績對辦，其股價亦自踏入4月以來由1.64元穩步炒上，月內最高曾見2.08元，前日受市況大跌拖累回吐，但昨日股價照跟市況回升，一度見過2.02元，不過完場前升幅收窄，最後僅升0.01元，收1.95元，走勢似在營造旗形，後市只要守於10日線1.91元以上，升勢仍未玩完，可伺機吼位短炒，目標2.30元，跌穿1.80元止蝕。
勝利管道去年多賺1.3倍，至3.4億元人民幣，每股基本盈利31.01分，派末期息2港仙。
方星俠