醫藥股繼續喪炒，相關股份昨日幾乎全線掃高，呢個現象好耐都冇見過。其中一隻喪炒股係剛公佈業績的維奧醫藥（1164），繼前日升13%後，昨日再升28%，收報0.305元。
該公司宣佈業績同時，也宣佈改名為維奧集團，以反映其更廣泛之投資策略，改得名應該有動作在計劃當中，否則唔使勞師動眾去改名。
維奧09年度盈利倒退13.2%至5301萬元，但由於該公司早已發出盈警，故上述消息市場早已消化。事實上盈警已指出公司面對的情況，公司聲明說預期09年下半年盈利受到集團藥品「Osteoform」更換進口藥品註冊證的影響，業績預期將錄得大幅度盈利倒退。上半年集團純利3725萬元，已較上年同期倒退34%，下半年實際只賺約1600萬元。
有機透過併購壯大
以上消息市場一早已經知道，因此其股價一直落後同業，但中國醫改方案將拉動醫藥行業，作為早已在內地擁有龐大分銷網絡，02年已經上市的第一代藥股，相對於中國國藥（1099）般的老行尊，維奧少了一個主要業務，冇理由繼續得個等字，以其行內地位，要取得另一隻有潛力藥物的代理絕對唔難，而公司已表明會利用其商標「樂力」開拓健康產品業務，並物色收購機會。
維奧市值不過4.7億元，要炒高的想像空間相當之大，要重新壯大兼集資收購，這股醫藥股熱潮是千載難逢的機會。
歐陽風